「山㝫比喻」(一)《共和國篇／理想國》Republic－柏拉圖

山㝫比喻《共和國篇／理想國》第七章－柏拉圖 （一）
Allegory of the cave from “Republic” chapter VII – Plato
－－－－
廣東意譯：

[加魯安係柏拉圖阿哥，其實喺段對話錄入面都係二打六，主要都係有把聲應吓蘇格拉底咁]

蘇格拉底：
嗱，而家等我用一幅圖畫解釋吓我哋本質有冇被啟蒙、同埋啟蒙咗幾多啦。

你睇吓，有班人喺個地底山窿入面生活。山窿有個出口，個出口光掁掁[caang4]，一直由裡面通出嚟。呢班人一出世就喺度，對腳同埋條頸都畀人用鎖鍊綁實，郁都郁唔到。佢哋淨係望到前面嘅嘢，因為畀人綁到連頭都擰唔到。喺佢哋後面高少少、遠少少嘅地方，有個營火喺度燒𡁵。個火同班囚犯中間有段起高咗嘅路。如果你睇清楚啲，你會發現呢闕路上面原來係起咗埲矮牆。埲矮牆就好似木偶戲嗰塊幕咁，有人會喺高過塊幕嘅地方放啲木偶公仔畀人睇。

加魯安：
哦，我睇到啊。

蘇格拉底：
你又睇唔睇到另外一啲人沿住埲牆行？呢啲人拎住各式各樣嘅容器、雕像同動物模型－有木制嘅、有石制嘅、仲有啲係用其他唔同嘅物料整成𠻹。佢哋將呢啲物件舉高，舉到高過埲牆。有啲人就喺度講吓嘢，有啲人就靜靜哋咁。

加魯安：
你形容嘅畫面都幾怪雞㗎喎，同埋班囚犯都好怪啫。

蘇格拉底：
咪就係好似我哋咁喳嘛。嗱，啲犯係咪淨係睇到自己個影同埋隔離啲犯個影，因為個火將佢哋啲影照咗去山㝫對面埲牆度吖？

加魯安：
係吖。如果佢哋個頭根本都郁唔到，咁除咗啲影之外仲睇到啲咩喎？

蘇格拉底：
好，咁就講返嗰啲畀人舉高咗嘅物件。班犯係咪都淨係睇到個影呢？

加魯安：
係啊。

蘇格拉底：
如果班犯係可以傾吓計嘅話，你估佢哋係咪會試吓畀個名畀嗰啲喺面前嘅嘢？

加魯安：
都係啊。

蘇格拉底：
咁如果個監倉另一面係會發出回音嘅，當啲人行嚟行去又發出聲音嗰陣，你估班犯係咪肯定會以為啲聲係喺個影度發出嚟吖？

加魯安：
一定啦。

蘇格拉底：
咁嘅話，睇嚟對班犯嚟講，「真實」同啲影直頭係一模一樣喎。

（待續）

－－－

來源：
http://classics.mit.edu/Plato/republic.8.vii.html