山㝫比喻《共和國篇／理想國》第七章－柏拉圖 （二）[完]
Allegory of the cave from “Republic” chapter VII – Plato
想睇上篇請去最下嗰條Link。最近小編忙於寫論文，更新得冇咁頻密，請見諒…幾時寫完論文啊…
話時話，大家知唔知The Matrix《廿二世紀殺人網絡》 [編者按：其實香港個譯名係幾無厘啦更..]呢套戲其中好重嘅哲學概念係嚟自呢個山㝫比喻？
—–
（續上篇）
蘇格拉底：
咁嘅話，睇嚟對班犯嚟講，「真實」同啲影直頭係一模一樣喎。
加魯安：
又係喎。
蘇格拉底：
你試吓諗吓，如果其中有個犯畀人放咗，仲畀人點醒咗㖭，咁件事會係點呢？當有人幫個犯鬆綁，然後逼佢企起身、叫佢擰轉身、再行前幾步、向住火光嗰邊望，個犯應該會覺得隻眼好痛；同埋，就算個犯面對面對住嗰啲物件 － 即係用嚟投射個影喺埲牆度嗰啲真實物件，佢都會畀啲光掁到乜都睇唔到。假如有個人同佢講：「之前你睇嘅嘢都係假㗎！而家因為你行近咗去啲真嘢度，又擰返轉身對住啲真嘅嘢，所以你先睇得清楚過之前咋。」如果唔單止咁，我哋再進一步指住啲物件逼佢答嗰啲係咩嘢嚟。你估佢係咪會覺得好疑惑，覺得之前所睇到嘅嘢仲真過而家望到嘅嘢？
加魯安：直頭係會覺得之前嗰啲嘢真啲啦。
蘇格拉底：
咁如果佢畀人逼住望實個火，你估佢係咪會覺得啲光掁到隻眼好痛，所以寧願走佬返去之前睇到嘢嗰度，而且反而會信之前嗰啲嘢真過而家逼佢睇嗰啲嘢吖？
加魯安：會啊。
蘇格拉底：
咁又如果有個人夾硬拖佢走；沿住一條又斜、又凹凸不平嘅路扯住佢向上行，總之一日未出到去見到陽光都唔放手；咁你話嘞，個犯係咪會覺得又痛又嬲吖？仲有啊，當佢去到陽光底下，佢隻眼係咪會畀啲光掁到乜都睇唔到吖？就算係嗰啲所謂最真實嘅嘢都睇唔到啊。
加魯安：
係啊，都真係會睇唔到㗎。至少啱啱開始嗰陣會睇唔到囉。
蘇格拉底：
如果個犯想睇得到山窿外面嘅世界，我估都要啲時間慢慢先適應到。一開頭，啲影對佢嚟講係最易睇到。然後佢可以慢慢睇到水入面倒影照出嚟嘅人同埋其他嘢。再下一步佢先真係睇到啲實物。過埋呢個階段，佢就可以喺入夜之後望到天上面嘅星星同月亮，或者直頭望吓嗰一片夜空，呢樣嘢會比起日光日白望住個太陽同埋望到啲太陽光容易。
加魯安：梗係。
蘇格拉底：到最後，我諗佢終於可以望到個太陽。唔單止係太陽個倒影，而係直接望到太陽本身。當佢望到個太陽，佢就會知道個太陽係點嘅樣。
加魯安：係啊，佢一定會望到啊。
蘇格拉底：
咁之後，佢已經可以得出個結論，就係四季寒暑原來都係由呢個太陽而嚟；個太陽又掌管住呢個見得到嘅世界。而且佢仲會明白到以前佢同埋佢啲同伴睇到嘅嘢原來都係由個太陽而嚟，太陽就係一切嘢嘅源頭。
加魯安：冇錯吖，呢個都係好明顯嘅發展吖。
蘇格拉底：
你覺得當佢諗返以前住嘅地方、以前山窿入面所謂嘅智慧、同埋以前住埋一齊嘅囚友，佢會有咩感覺？你估佢係咪會好開心自己有呢個轉變，同埋又會覺得啲囚友好可憐？
加魯安：梗係。
蘇格拉底：
咁如果山窿入面有個比賽，大家喺度鬥邊個最眼利認得到啲影；邊個最好記性記得邊樣嘢出先、邊樣嘢之後出、邊樣嘢同時出，即係話邊個預測得最準確；咁就算嬴到個比賽會有名譽、讚賞或者禮物都好，你估嗰個犯會唔會想要呢啲嘢？佢會唔會羨慕啲得獎嘅人？定係你覺得佢會寧願「做牛做馬服侍人，但係身無分文一個崩都冇」，寧願捱苦都唔想同佢哋信埋同一樣嘅嘢、好似佢哋咁生活吖？
加魯安：
係啊，我都估佢寧願捱咩苦都好，都唔想返返去之前嘅生活。
蘇格拉底：
好嘞，假設佢真係返去參加比賽，同嗰班犯鬥認得出啲影。當佢啱啱入返個窿嗰陣，視力會唔習慣咁暗嘅環境，又冇足夠時間畀佢適應，咁你估佢係咪會畀人恥笑？啲人係咪會話佢上咗去之後連隻眼都打咗柴，所以根本就唔值得行上去？如果有人嘗試放咗啲囚犯、帶佢哋上去，你話佢哋係咪會一有機會就殺咗佢？
加魯安：一定係。
蘇格拉底：
嗱，加魯安，啱啱所講嘅成幅圖畫要同我哋之前所傾嘅嘢砌埋一齊睇至得[即係《理想國》第七章之前]。我哋肉眼睇到嘅世界，就好似山窿入面個監倉咁；我哋呢個世界嘅太陽就對應山窿入面個火光。如果你話向上行嘅過程同埋上到去見到山窿外面個世界係代表靈魂昇華到知性世界嘅過程，你咁講都係非常之啱；呢樣亦都正正係你本身想聽嘅嘢。但係只有神明先知呢啲嘢係咪真嘞。不過無論點都好，我自己係咁諗嘅：喺個知性世界入面，最後望到嘅就係「善」嘅理型，不過呢個係要經歷千辛萬苦先會睇到。但係只要你睇過一次，你就會推論到呢個「善」嘅理型係所有啱嘅嘢同埋靚嘅嘢嘅源頭。呢個「善」嘅理型亦都喺可見世界入面提供咗光芒同埋光源，仲有喺知性世界入面掌控同提供咗真理同明辨。如果一個人想在公在私都做得好，佢一定要睇見呢個理型。[理型係哲學術語：”Form”，呢度唔多解釋。]
－－
上篇：
山㝫比喻《共和國篇／理想國》第七章－柏拉圖 （一）
講故佬 BookTalker 